بۇلبۇل بلوگى

0

تاماكا بايان

176

توسما مېنى يار ، چېكەي بىر نەپەس،

ئۆرگۈلدى پەلەك ، تاماكا بايان:

ئەمەستى ماڭا چېكىش بىر ھەۋەس،

كۆيىدۇ يۈرەك ، تاماكا بايان.

يانار تاغ ئىچى بولغاچقا يالقۇن،

دائىم ئۈستىدىن كەتمەيدۇ تۈتۈن.

ھەيران قالمىغىن چىقسا ئاغزىمدىن

كۆكۈچ چەمبىرەك ، تاماكا بايان.

بىلىمەن دىلدار ، يۇتىمەن زەھەر،

تېگەر ھەر سائەت يۈرەككە نەشتەر.

ۋە لېكىن شۇنى ئىستەيدۇ كۆڭۈل،

ئەمەسمەن گۆدەك ، تاماكا بايان.

سارغايدى دېمە رەڭگىمنى جانان،

نىكۇتىن ئەمەس مېنى سارغايتقان.

بېغىمنى كەچ كۈز بورىنى باسسا،

سولمامدۇ چېچەك ، تاماكا بايان.

قاچانكى باقسام غەمكىن يۈزۈڭگە،

ئاچچىق ياشلىرىم تولۇر كۆزۈمگە.

قايغۇ-ئەلەمنى باسىمىش دەيدۇ،

شۇ كۆكۈچ تۈتەك ، تاماكا بايان.

توسما مېنى يار ، چېكەي بىر نەپەس،

چەكمەي دېسەممۇ ، بۇ مەيلىم ئەمەس.

مەيلى ئەمەسمۇ شۇ زەھەر بىلەن،

سەگىسە يۈرەك ، تاماكا بايان.

1948 – يىل 12 – دېكابىر ، ئۈرۈمچى

ئالدىنقى شېئىر:

كېيىنكى شېئىر:

شېئىرلىرىمىزنى ياقتۇرغان بولسىڭىز بېكىتىمىزگە مۇشتەرى بولۇپئەڭ يېڭى شىئىرلاردىن خەۋەردار بولۇڭ

سىزمۇ باھا يېزىپ بېقىڭ