بۇلبۇل بلوگى

0

رۇبائىي ۋە پارچىلار

243

يۈرەككە ئوق تىگىپ ياتسام ئىدى ئاستانىدا ھەي-ھەي،
مازارىم گۈل قۇچۇپ قالسا ئىدى بوستانىدا ھەي-ھەي.
ۋەتەننىڭ دانە تۇپراقى گويا ئالتۇن، ھىدى زەپەر،
تەۋەرۈك نامىنى يازسام ئىدى داستانىدا ھەي-ھەي.

***********************************************

ھەقىقەتنىڭ روھى قېچىپ كەتتى مېنىڭ دىيارىمدىن،
نە بولدى خۇشپۇراقى ھېچ كەتمىدى بۇ دىماغىمدىن.
ئىزلىدىم كۆپ تاپمىدىم شەجەن روجەن سەھراسىدىن،
ئىزدىبان تاپتىم-دە، ئالدىم لېنىننىڭ گۈلباغىدىن.

**********************************************

جەبىر-زۇلۇمدىن قۇتۇلماي، ئۆتمەكتە ئۆمۈرلەر تامام،
<يالغۇز ئاتنىڭ چېڭى چىقماس> يا يەتمىدى مېنىڭ چامام.
مىسلى كۆزنى تېڭىپ جۇۋازغا قوشقان سېرىق ئۇي،
تېپىلماس يەر يۈزىدە زۇلۇمغا بىزدەك چىڭ چىدام.

*********************************************

ئومۇمىي ھالىمىزغا قايغۇرۇش، بىزلەردە ھاماقەتلىك،
ئالالىساق ئىككى-ئۈچ خوتۇن، دېگەيلەر خوپ شىجائەتلىك.
يوغان سەللە، ئۇرۇن تونلار بىلەن بىزلەر دىيانەتلىك،
كۆرۈشكە زاھىرەن تەقۋا كۆرۈنمەستە خىيانەتلىك.

********************************************

ئورىلار كولىنىپ يول ئۈستىگە، ھەر يەرگە قۇرمىش دام،
لېكىن يول يۈرۈش ئىلمىدە كۆزىمىز ناھايەت خام.
قىلۇر ئاقنى قارا، كۆرسەك قىلۇر تۆھمەت، يامان بەتنام،
ھەقتىن سۆز ئاچساق، بېرۇر بىزگە يامان دەشنام.

*******************************************

بۇ يول ئوتۇڭدا ئۆرتەندىم، يۈرەك-باغرىم كاۋاپ بولدى،
سېنىڭ دەردىڭنى جىق تارتىپ، پىغانىم بىھىساپ بولدى.
ئۇيغۇرا ۋەسلىڭگە يەت! دەپ ۋىجداندىن خىتاپ بولدى،
تاقەتكە قالمىدى ۋاقىت، بۇ جان ئەمدى چىداپ بولدى.

*******************************************

غېرىبنىڭ ھالى مۇز تەردۇر، نەزەر قىلغىن ئايا جانان،
سېنىڭدۇرمەن ئايا جانان، ساڭا باشىم بىلەن قۇربان.
شىپالىق يولىنى كۆرسەت، قىلىپ دەردىم ئۈچۈن دەرمان،
ئۆلۈم ئالدىدا كۆز يۇمماي ئۆلەرمەن قالمىغاي ئارمان.

*******************************************

دەردى دەۋرانلار ئۇزۇن، ۋاي داد! ئۆمۈرلەر قىسقىمىش،
تەجرىبە كەم، ئېھتىياج جىق، ھەر ئىشى بىنۇسخىمىش.
ياخشىدىن كۆپرەك يامانغا نەپسى بىزنى قىستىمىش،
مېۋىسىز بولسا دەرەخ، ئاندا نە ئىش قىلسۇن يېمىش.

********************************************

توپىدا ياتسا گۆھەر،
بولماس باھاسىغا زىيان.
سۇ ئاقۇر ئاققان ئېرىقتىن،
سايدا ھەم تاشقىن قىيان.

*****************************

نېچۈك ئەھۋالدىدۇر مىللەت،
ئۇيغۇر ئەۋلادى ئېچىڭ كۆزنى.
قىلىڭ غەيرەت، قىلىپ ھىممەت،
قوپۇڭ، تاشلاپ قۇرۇق سۆزنى.

ئالدىنقى شېئىر:

كېيىنكى شېئىر:

شېئىرلىرىمىزنى ياقتۇرغان بولسىڭىز بېكىتىمىزگە مۇشتەرى بولۇپئەڭ يېڭى شىئىرلاردىن خەۋەردار بولۇڭ

سىزمۇ باھا يېزىپ بېقىڭ